WALIMU WILAYANI BUHIGWE WAASWA KUTOFANYA KAZI KWA MAZOEA

Posted on: June 3rd, 2024

Walimu wa shule za msingi na sekondari katika Halmashauri ya Wilaya ya Buhigwe mkoani Kigoma wametakiwa kuacha kufundisha kwa mazoea na badala yake wahakikishe wanawapa watoto ujuzi na si  kuharakisha  kumaliza mada   ili kupandisha kiwango cha ufaulu.

Rai hiyo imetolewa leo Jumatatu  Juni 3, 2024  wilayani Buhigwe  na Naibu Katibu Mkuu OR TAMISEMI (Elimu) Dkt. Charles  Msonde alipokuwa akionge na walimu hao katika ukumbi mkubwa wa Halmashauri.

Amesema ili kufanikisha mkakati wa serikali wa kuongeza ufaulu ni lazima wazingatie misingi minne ya ufundishaji inayojumuisha  uwezo alionao mtoto, mazingira wanayopatia elimu, umri waliokuwa nao ili ujue unaenda nao vipi pamoja na utayari wa kupokea unachokitoa kwao.

“F yoyote ni ya mwalimu si mwanafunzi KPI ya kila mwalimu ni kuhakikisha kwenye somo lako hakuna F…ukiangalia ukaona walimu waliokutangulia wamefanya makosa rekebisha kwa kufanya hivyo hawataona kile unachowafundisha ni kigumu,".

Aidha, ameelekeza walimu wa shule za sekondari kuhakikisha wanafunzi wanapojiunga na kidato cha kwanza wanawajengea ujuzi wa kujua lugha ya kiingereza kwa kuandika, kuzungumza, kuelewa na kusoma alafu mchakato wa kuufundisha masomo mengine ndio uendelee.

 Naye Kaimu Mkurugenzi wa Halmashauri ya Wilaya ya Buhigwe Emily  Fwambo amesema kuwa halmashauri itahakikisha inatekeleza yale yote waliyoagizwa ili kuleta mabadiliko katika sekta ya elimu na matokeo yake yataonekana.