Hongereni vijana kutuletea makombe

Posted on: August 27th, 2019

Mkurugenzi Mtendaji wa Halmashauri ya Wilaya ya Buhigwe ndugu Anosta Lazaro Nyamoga (kulia) ametoa salamu za pongezi kwa vijana wa shule za Msingi na Sekondari kwa kuibuka washindi na kuleta makombe ya michezo mbalimbali katika mashindano ya UMITASHUMTA NA UMISSETA ngazi ya Mkoa yaliyofanyika hivi karibuni. Akizungumza wakati wa kukabidhiwa makombe hayo Ofisin kwake leo asubuhi Nyamoga amesema "ni vema kuendeleza michezo kwa watoto na vijana wetu walioko shuleni kwakuwa michezo ni afya na huimarisha ujirani mwema, aidha michezo ni ajira, hivyo viwanja vya michezo viboreshwe na viwe na ulinzi utakaowawezesha watoto wa jinsi zote au hali zote kucheza kwa uhuru. Watoto wenye ulemavu wasitengwe kwakuwa wana haki kama walizonazo watoto wengine."

Kwa upande wake Afisa Elimu Maalum ambaye pia ni kaimu Afisa Michezo ( W) ndugu Issa Kambi (katikati) amemshukuru Mkurugenzi Mtendaji na kuahidi kuendelea kusimamia michezo kwa weledi ndani ya Wilaya si kwa wanafunzi tu bali hata kwa watumishi wa Wilaya yetu ya Buhigwe.

Aidha Afisa Elimu Msingi ndugu Fred Fandey (kushoto) hakubaki nyuma katika kutoa shukrani zake za dhati, akiwapongeza walimu na wanafunzi kwa kujituma kitu ambacho kimeleta matunda kwa wilaya yetu.